數碼電台勁蝕減人工 洪朝豐唔撈
[轉載/Youtube]鄭經翰（大班）創辦嘅香港數碼廣播電台（DBC）舊年大灑金錢挖角，但開台僅9個月就盛傳因為勁蝕要開源節流緊縮開支，由下月開始全部DJ及幕後員工要減人工，減幅由百份之20至60，有傳洪朝豐、陳海琪、顏聯武、麥潤壽同李麗蕊等都無一倖免，梁思浩就同大班講數，應承一年內搵夠廣告錢，所以暫時唔使減人工。大班未回應
有傳DBC開台以嚟勁蝕，所以電台惟有下個月全部人減薪。另外，其中以年輕人為主嘅大晒台會cut台唔做，而大錢台亦會cut晒講波講馬節目。馮仁昭噚日打電話向大班求證減人工事，佢秘書回覆話大班唔喺香港，佢會將有關問題轉告大班，但到截稿都未收到大班回覆。
洪朝豐日前主持電台節目時，突然宣佈下個月封咪唔做，莫非係同大班今次減人工有關？洪朝豐噚日回覆話：「係有減人工，大班已經對我好好，只係減我五分一，我知有啲減超過一半。但我今次離職同減人工無關，我今次純粹個人決定，因為我想轉型做男高音歌手，重拾我20幾年嚟嘅夢想。」陳海琪就冇否認減人工，只係話：「一間咁大嘅公司，開源節流好正常，不過，我唔係合適位置去答呢個問題，你問番大班啦。」
