歐國盃 MV戰火自焚送禮勤又撞板急耍冧
[轉載/Youtube]李克勤最近人氣席捲歐洲，但是悲不是喜！克勤早前為now主唱2012歐洲國家盃的主題曲《決戰草原》，原希望收宣傳之效，但因MV中炮火連天的畫面令人感覺猶如戰爭，遭歐洲球迷狂插，有「送禮勤」之稱的克勤昨日急急認錯，但又再淪為網民笑柄。李克勤、黃婉曼、陳嘉寶（Anjaylia）等昨到金鐘出席「麥當勞 x now TV─2012歐國盃Double Kick Off」記招，早前克勤為now TV拍2012歐國盃主題曲《決戰草原》MV，但MV內的戰爭畫面觸怒歐洲人，尤以波蘭人最激動。
改編舊軍歌
對於MV捱轟，克勤昨解畫：「成個團隊同now都冇諗過會有咁大聲音出嚟，要同波蘭、歐洲嘅人講，如果令佢哋唔開心，我表示歉意。」克勤強調MV只是以漫畫手法表達娛樂事，香港的建築物也常在電影中被炸，望大家不要太認真。
原來《決》曲由克勤改編自蘇聯舊軍歌，他說：「我唔識蘇聯文，唔知佢講乜，只係用咗首曲，發夢都估唔到係同蘇聯、波蘭戰事有關，MV已經喺YouTube度收番，剪走啲敏感鏡頭，約一星期會有新版本。」克勤指國際足協亦就此事跟now聯絡，要求刪剪敏感鏡頭，克勤說：「唔想足球涉及政治，係我哋做音樂時疏忽，希望大家息怒。」談到南華球員陳肇麒因紀律欠佳被班主羅傑承開除，克勤認為可惜，希望肇麒在其他球會有好表現。
克勤向來喜歡英超的曼聯及英格蘭國家隊，多年前曼聯訪港，克勤自製紀念品送給愛隊，但其紀念品被發現遭丟棄在更衣室，克勤因而被網民取笑為「送禮勤」，最近進化成「宋禮勤」，今次再為足球出力被外國球迷狂插，克勤又成網民嘲笑對象，被取笑送禮送到波蘭，真正衝出亞洲。
