妻女返港即作反：浩民搬酒店纏佘
[轉載/Youtube]現年42歲嘅陳浩民去年喺橫店開工，涉嫌借醉向陳嘉桓鹹豬手，幸得當時挺住巨肚嘅老婆蔣麗莎力撐，事發後蔣麗莎生咗囡囡陳雅薷，浩民亦曾承諾，戒酒專心工作做個好老公。不過，浩民成日喺內地拍劇，爛玩爛飲嘅佢，冇老婆喺身邊管實，始終會有問題出現。浩民舊愛佘詩曼近排去咗橫店拍劇吸金，浩民咁啱又喺橫店開工，有劇組人員爆料話，劇組一早已安排咗浩民住某間酒店，但當浩民知道盛女阿佘住就近另一間酒店時，佢竟然貼錢搬去同阿佘入住同一間酒店，唔通想方便密會？
浩民妻啞忍
其實蔣麗莎見橫店環境唔係太衞生，湊住B女好唔方便，早排兩母女就返咗香港小住，老婆呢頭帶女走咗，浩民就作反，蔣麗莎雖然收到風知道老公唔生性，但為免影響夫妻感情，只得啞忍。為咗舒緩情緒，蔣麗莎成日寫微博吐心聲，佢日前先留言：「不生氣，才叫境界。」蔣麗莎晒極強EQ對付姣佘，力保正印之位。
