溫兆倫8月做老竇晒溫馨 郭羨妮囡囡滿月笑住瞓
[轉載/Youtube]郭羨妮（Sonija）和溫兆倫在05年宣佈分手，如今各自找到另一半，Sonija昨日在微博放上BB女笑咪咪的瞓覺相，透露為剛滿月的女兒改了潮名Kylie。而被指8月榮升做老竇的溫兆倫，前日則與妻子趙庭在微博晒恩愛，放上一張手牽手騷婚戒相，疑慶祝結婚紀念日。昨日是郭羨妮女兒滿月的大喜日子，Sonija一早將女兒的得意瞓覺相上載到微博，為女兒代筆寫道：「我今天滿月了！謝謝各位uncle、auntie送給我美美的衫衫和用品，更要謝謝醫生和醫院的靚姑娘姐姐們對媽媽和我的悉心照顧，我叫Kylie，請多多指教。」
小Kylie睡着仍是一臉笑咪咪，加上招牌腰果眼，非常趣緻，Sonija昨日在電話中說：「唔知點解佢瞓着都會笑，呢個應該係一個無意識嘅笑。」Sonija透露為湊女令生活日夜癲倒，昨午二時多仍未睡覺的她說﹕「通宵冇瞓，同媽咪分日夜更湊住囡囡，佢好醒目，成日扭計，知道一喊就有人抱，好麻煩。」Sonija透露已為女兒改英文名叫Kylie：「Kylie冇乜特別意思，只係唔想改個太上世紀嘅英文名，覺得Kylie潮啲。」Sonija透露傷口仍痛楚，已減少餵人奶，問到怎樣與囡囡慶祝滿月？她說：「老公喺上海工作，等齊親戚朋友可能要BB三個月先食飯。」
