「劉醫生真係好勁」阿倫佩服師兄拗直祖兒
阿Sa否認同劉浩龍拍過拖
[轉載/Youtube]自從劉浩龍和容祖兒驚爆戀情後，惹來外界極大的迴響，不少人不看好這段女尊男卑戀情，更有網民毫不留情鬧師兄是「賤七」。譚詠麟被問到對祖師戀的看法，他抵死地說：「如果、如果真係攣都拗番直，仲唔係劉醫生？劉醫生好嘢，真係好勁！」劉浩龍和容祖兒驚爆戀情後，惹來外界極大的迴響，譚詠麟（阿倫）昨日凌晨在電視城主持《歐洲國家盃》，阿倫表示有留意報道，問到祖師戀備受抨擊，阿倫笑說：「師兄係劉醫生！」再三追問下阿倫抵死地說：「如果、如果真係攣都拗番直，仲唔係劉醫生？劉醫生好嘢，真係好勁，不過我都係講笑啫！佢哋好登對。」問到會否覺得何韻詩是受害人？他又說：「我點知內情呀，我又冇幫佢把過脈。」對於好友阿叻和王晶為今屆港姐互片，他說：「冇嘢喇，佢哋有傾番偈。」阿倫更爆阿叻已經致電給王晶說了幾聲sorry。
「希望佢都錫我」
容祖兒昨日出席紅館舉行的大匯演，被問到阿倫笑稱師兄是劉醫生，可以攣都拗番直，祖兒聽聞後先愕然，跟住笑笑口說：「嘩！有冇搞錯呀？我係乜嘢阿倫又點會知呀？我好尊敬佢同好錫佢，希望佢都錫我喇！」祖兒又透露：「Eason佢黐咗線呀，成日叫我搵佢，又話想同我傾偈，特別係呢段時間，不過我好了解佢，我知佢係呃水吹，有啲嘢係純八卦。我覺得自己嘅事可以自己搞掂，我冇乜嘢同佢講。」
祖兒又稱自己很少與朋友傾心事，問她何韻詩是否仍然是她的傾訴對象？她說：「佢一直都係，以後都係，唔會將友情同感情嘅嘢拎出嚟講，終有一日我哋會同台，大家就知乜嘢事。」是否有信心會在年尾頒獎禮前解決？祖兒說：「面對工作係要專業，友情係永遠。」網友對劉浩龍的批評？她說：「呢啲我唔講喇！總之有好消息或者乜嘢變化會同大家講。」
康仔鬧網民唔化
另外，蘇永康昨日出席演唱會的宣傳活動，他力撐被圍插的師兄：「我話啲網民唔化，佢哋係咪想見到每段萌芽嘅戀情，搞到焦頭爛額先開心，係咪喺事業地位上做對比？係咪個個要好似安仔同Sammi咁先匹配？我對呢啲網民好鄙視，正一憎人富貴厭人貧，你話我蘇永康話嘅，唔滿意就插我喇，使怕你！」會否擔心兩人的戀情告吹？康仔說：「如果咁樣就經唔起考驗，佢哋兩個有成熟思維，所以我唔會插手！」
