馬德鐘不排除客串《衝II》
[轉載/Youtube]馬德鐘自從離開無綫向外闖後，對TVB自然唔使畀面，前晚他偕妻兒出席首映禮，對於《衝上雲霄II》被飛走，他死撐自己在首輯已死，難以安排復活。對於胡杏兒也能一人分飾兩角，馬神即寸無綫製作冇新意。馬德鐘（馬神）、徐淑敏與老公黃浩、名模Ana R.和Jessica C.等，前晚到機場UA IMAX戲院欣賞《蝙蝠俠──夜神起義》（The Dark Knight Rises）首映禮。馬神與太太、兒子及愛兒的同學仔一齊捧場。
「拍唔到唔覺可惜」
馬神離開無綫向外闖後，對TVB自然唔使畀面，加上早前有指因為他和宣萱非無綫自己友，所以連新劇《飛虎》都慘變炮灰被迫做周末劇。《衝上雲霄》拍續集，在首輯已死的馬神被out，他對此說：「第一集有得做已好開心，有留意新聞，卡士好勁，第一集我死咗，唔知點安排出嚟，拍唔到都冇辦法，唔覺可惜，不過安排到我出嚟都可以拍，但唔好老套囉，要特別啲出嚟先好。」
雖然馬神不恨拍《衝II》，但他坦言十分高興吳鎮宇再拍續集，因為大家合作已事隔十年。問馬神是否也想參與拍攝續集時，他強調要因應情節安排，記者指胡杏兒都能在續集中一人分飾兩角，他即暗寸說：「咦，咁冇新意。」
Suki夫投蝙蝠車牌
此外，徐淑敏（Suki）透露老公黃浩是超級Batman迷，黃浩亦自爆有關Batman的東西都一定捧場，以前更想買一架蝙蝠俠車及一比一的figure公仔。早前黃浩投得「BATMAN V」車牌，他十分開心。
