劉江華拆花槽 欺善怕惡
[轉載/Youtube]試問全世界有邊一個政黨，有禮義廉咁可靠、體貼、細心？佢哋一打探到地區上有咩唔順眼，都會搶先為老百姓跟進。沒有禮義廉，過馬路綠燈公仔就唔能夠延長「兩秒」、木棉飄絮就絕冇可能消失。八方收到風，禮義廉大佬劉江華，最近仲出面為街坊爭取拆花槽呀－－不過就唔係西環嗰個囉。西營盤議員變鵪鶉
禮義廉近日喺上水貼咗張告示，話已去信當局，要求拆除一個阻住居民出入嘅花槽。呢個喺龍琛路近宣道會門前嘅石壆，十足十中聯辦門外嘅「多嚿魚」花槽咁，阻頭阻勢。「正義」嘅劉江華就貼咗張通告，雞乸咁大隻字寫明「要求移除阻路石壆」，話個花槽平日影響區內居民出入，當區區議員柯倩儀已去信有關部門，要求拆走。
不過呢，心水清嘅人士當然知道，全港最阻街嘅花槽唔係喺上水，而係喺西環中聯辦門外。呢個政治花槽，令行人路大幅度收窄，令差佬有大條歪理拒絕示威人士喺中聯辦門外停留。禮義廉咁關心花槽阻街，又唔見佢哋就西環個花槽出下聲？
中聯辦位於西營盤選區，當區區議員同樣係禮義廉嘅黨員，叫做盧懿杏，但係走遍全區，都唔覺禮義廉或者劉江華張貼類似嘅通告，總之就鵪鶉咁款，粒聲唔出。皆因呢個花槽係阿爺嘅保護罩，拆走嘅話，阿爺仲點會有安寧日子過呢？正如陳淑莊話齋，「中央」係唔可以接觸㗎！
