Kelly復工闖無綫驚迷路 安仔儲肥 Sammi婚期近
許志安、陳慧琳和曾志偉等前晚擔任草蜢主持的無綫遊戲節目《環遊世界明星賽》嘉賓，志偉笑言得知節目有食蕉及餵人奶環節，但蔡一智表示遊戲是玩五大洲，志偉即大講有味說話：「好勁，玩埋五大『洲』，搵埋安仔出嚟咪五大『洲』囉。」
着緊女友病情
44歲的安仔和39歲的鄭秀文（Sammi）盛傳今年9月在歐洲結婚，雖然安仔多次否認婚訊，但前晚提及Sammi即甜到漏油說：「你哋咪諗啦，真係未有，我7月出碟，好多嘢做，好忙，成咗事先，呢行冇得呃，同政府一樣透明度好高，你哋實知。」
對於近日Sammi耳水不平衡又發作，問安仔可有呵番女友，他即說：「冇，等佢休息吓先，希望佢肥少少先出嚟，之前瘦得滯，要健康啲，肥番啲先平衡啲。佢休息緊睇緊醫生，未知幾時復工，等狀態好啲，最重要係精神。」
安仔本月將擔任歐陽德勛和蔡立婚禮的伴郎，到時他負責遞戒指，他笑指幸好兩人在香港搞婚禮，不然到英國又會被指他順便結婚，他未知Sammi會否赴宴：「未試過遞戒指，要問人乜嘢時間遞，唔使預演，自然啲就得。」取笑他可作為與Sammi婚禮的預演，他即甜笑扯開話題。
Kelly想減十磅
產後復出的Kelly前晚是自無綫與五大唱片破冰後，首度踏足電視城，她直言有些地方感覺不同，亦不識路，稍後會擔任TVB回歸騷的表演嘉賓，但不會帶長子蝦餃仔劉昇出席。Kelly現忙修身，希望減多十磅回到未生前的體形，她亦未收到劉德華的薑醋，未有機會見小龍女，沒有對親家。對於now將會舉辦樂壇頒獎禮及增設音樂節目，Kelly歡迎有更多音樂節目，但不支持再增加頒獎禮：「夾埋搞一個好啲，太多冇說服力。」
此外，安仔昨日到土瓜灣出席now飲食節目，現場是廚房，即被拿當年的廚房宣言開玩笑，安仔自言Sammi廚藝比家中工人稍勝一籌，是否應快娶女友入門，他笑說：「唔使，咁大油煙，自己嚟啦。」
