袁彌明狼變蟹 炒期指蝕到冇眼睇
[轉載/Youtube]上個月港股仆直，將今年嘅升幅一鋪清袋，好多人都變蟹，包括參選過港姐嘅袁彌明（Erica）。佢接受《爽報》訪問時講到「盛女」投資心得，原來佢唔只言行出位，投資仲好狼死，竟然鍾意炒期指！不過佢最近手上揸住唔少蟹貨，「蝕到冇眼睇」。去旅行咪揸貨
「我鍾意玩Day Trade（即日鮮），貪波幅大，夠晒刺激！我第一次入市，就喺08年金融海嘯嗰時，揀咗沽細期（小型恒指期貨），結果第一次玩就賺錢，初初幾個月，已經賺咗六、七十萬。」Erica仲話，為咗學炒期指，每日朝早5點就起身，睇吓美股歐股走勢，又要留意金價同國際新聞，咁勤力做功課，抵你贏錢啦！
不過，炒期指梗係有上有落，好似網上討論區嘅「巴打」，就成日攞Erica輸錢嘅投資組合嚟恥笑，華華當然想問佢蝕得最多係邊一次啦，佢就話自己炒親都好好彩，賺多過蝕，「其實啲網友只喺將我輸嘅錢無限放大，但我贏嗰啲就唔講！」
Erica仲提醒大家，如果要去旅行，就千祈唔好揸住啲貨，「我次次離開香港，個市就跌幾百點，又打唔到畀經紀，所以下次出門都係放晒啲貨先！」
