立會最後一日 議員最 friend一天
立會落幕 未能審議重組架構彈劾貪曾
立法會本屆最後一日會議
[轉載/Youtube]幾十名立法會議員噚日開完今屆會期最後一日大會後，正式為議會生涯畫上句號。今屆告別議員數目之多，幾乎係歷屆罕見；噚日立法會內有議員拍照留念，因為之後呢度唔再係佢哋主場；而成功爭取連任嘅議員，就要喺新一屆立會10月復會後，「番嚟再郁」。噚日嘅立法會越夜越精采，唔少棄選議員都周圍同戰友、記者以及立法會保安影相。盛傳因為要做副司長而棄選、最終變成「雙失」嘅「梁粉」陳茂波，雖然未致於眼泛淚光，但都好感觸咁款，周圍同人握手告別，當中包括唐唐家臣林大輝。
「內副」未定人選
話過N屆唔選特首嘅狼振英，最終都有選；唔知噚日話N屆唔選立法會嘅甘乃威，日後會唔會步狼振英後塵呢？甘乃威笑稱搵工前會同老婆外遊happy吓。同樣唔選嘅鄭家富，收到記者送上嘅心意卡同小禮物都好開心。佢卸任後除咗會開咪，仲會推動民間法援，幫小市民申寃。
95年入局至今嘅吳靄儀，都會退位讓賢。吳大狀透露之後會做番法律工作同專注寫作，任內最遺憾係未能全面取消功能組別。2000年入會嘅勞聯李鳳英亦會交棒畀新人；工聯會王國興仲向佢送上墨寶告別㖭。內會副主席李華明亦唔do，結束91年至今嘅議員生涯；「內副」係邊位，大家都未知，但肯定新一屆有成70位議員嘅立法會，一定同呢屆一樣咁熱鬧。
